Երևանի քաղաքապետ Տիգրան Ավինյանը Forbes-ի նոր հրապարակման մեջ ներկայացրել է մայրաքաղաքի առաջիկա խոշոր ներդրումային ծրագրերը՝ ընդգծելով, որ քաղաքը մտնում է զարգացման նոր փուլ։
Քաղաքապետը պատմել է Downtown Yerevan նախագիծի մասին՝ գործարար թաղամաս, որի արժեքը կազմում է մոտ 2 միլիարդ ԱՄՆ դոլար, մշակվել է ֆրանսիացի ճարտարապետ Ժան-Միշել Վիլմոտի կողմից և դառնալու է Հայաստանի նորագույն պատմության ընթացքում արտասահմանյան կապիտալի ներգրավմամբ ամենախոշոր քաղաքաշինական ծրագրերից մեկը։ Այն իրականացվելու է չօգտագործված տարածքների վրա, Նորագյուղի հատվածում՝ Երևանի կենտրոնին մոտ։
Նախագիծը ներառում է․
- նոր բիզնես և ֆինանսական կենտրոնի կառուցում,
- բնակելի համալիրներ և կանաչ տարածքներ,
- Երևանի լճի բարեկարգում ու վերականգնում։
Ավելին՝ ներդրողների համար նախատեսվում է բացել 150 հողատարածք։
Քաղաքապետ Ավինյանը հավելել է, որ մինչ «Downtown»-ի կառուցման մեկնարկը քաղաքը առաջ է մղում Վիլմոտի մեկ այլ նախաձեռնություն՝ Կասկադի համալիրի ավարտը, որի շրջանակում կստեղծվի ժամանակակից արվեստի թանգարան և շուրջ 1000 նստատեղով համերգասրահ՝ Արարատ լեռան տեսքով։
Բացի այդ, նախատեսվում է նաև Old City նախագիծը՝ Կոնդի պատմական թաղամասի վերափոխումը՝ այն վերածելով մշակութային և ժամանցային կենտրոնի։ Կոնդը, որը թվագրվում է XVII դարին, կպահպանի իր պատմական ինքնատիպությունը, սակայն կստանա նաև ժամանակակից ենթակառուցվածքներ ու հարմարություններ։
