OpenAI-ը գնահատվել է 500 միլիարդ դոլար՝ աշխատակիցների բաժնետոմսերի վաճառքի արդյունքում։ Այսպիսով, ChatGPT-ի մայր ընկերությունը դարձել է աշխարհի ամենաթանկ մասնավոր ընկերությունը՝ առաջ անցնելով Իլոն Մասկի SpaceX-ից։
Bloomberg-ի, CNBC-ի և Financial Times-ի տեղեկացմամբ՝ OpenAI-ն ավարտել է աշխատակիցների բաժնետոմսերի վաճառքի գործարքը՝ ընկերությունը գնահատելով 500 միլիարդ դոլար։ Վաճառքի ընդհանուր ծավալը կազմել է 6,6 միլիարդ դոլար։ Գնորդների թվում են Thrive Capital, SoftBank Group, Dragoneer Investment Group, MGX և T. Rowe Price։
Մինչ այս OpenAI-ն գնահատվում էր 300 միլիարդ դոլար։ Նախկինում աշխարհի ամենաթանկ մասնավոր ընկերության կոչումը պատկանում էր SpaceX-ին, որի արժեքը մոտ 400 միլիարդ դոլար է։ Երրորդ տեղում մնում է TikTok-ի մայր ընկերությունը՝ չինական ByteDance-ը, որը գնահատվում է շուրջ 330 միլիարդ դոլար։
Bloomberg-ը նշում է, որ OpenAI-ի գնահատման արագ աճը պայմանավորված է ներդրողների՝ արհեստական բանականության (ԱԲ) նկատմամբ հետաքրքրությամբ, քանի որ ԱԲ-ն ունակ է փոխակերպել արդյունաբերությունն ու տնտեսությունը։ Սեմ Ալթմանի ղեկավարած ընկերությունը Nvidia-ի հետ համարվում է ոլորտի առաջատարներից և արդեն կնքել է միլիարդավոր դոլարների գործարքներ Oracle-ի ու SK Hynix-ի հետ։ Վերլուծաբանների կանխատեսմամբ՝ առաջիկա տարիներին տվյալների մշակման կենտրոնների կառուցման համար կծախսվեն տրիլիոնավոր դոլարներ։
Միաժամանակ՝ OpenAI-ը դեռ շահույթ չի ապահովել։ The Information-ի տվյալներով՝ 2025 թվականի առաջին կիսամյակում ընկերության մաքուր դրամական արտահոսքը կազմել է մոտ 2,5 միլիարդ դոլար։ Այնուամենայնիվ՝ ընկերության եկամուտը հասել է 4,3 միլիարդ դոլարի, ինչը 16%-ով ավելի է, քան ամբողջ 2024 թվականի ցուցանիշը։ Ըստ կանխատեսումների՝ OpenAI-ի տարեկան եկամուտը կարող է հասնել 13 միլիարդ դոլարի։
